Duha gipusil sa Talisay, usa suspek sa OFW-murder

CEBU, Philippines - Usa patay ug usa ang angol sa nahitabong duha ka pagpamusil kagahapon sa hapon diha sa sitio Kagang barangay Dumlog ug sitio Miramar, barangay Poblacion parehong sa dakbayan sa Talisay kinsa usa sa mga napusilan mao ang suspetsado sa pagpatay ug paglubong sa 60-anyos nga kanhi Overseas Filipino Worker nga babaye.

Patay diha-diha si Violeto Caburnay, 42, taga sitio Kagang human kini unaya sa pagpusil sa iyang silingan nga giila lang sa ngalan nga si “Dambo” kinsa gipangita karon sa kapolisan.

Si PO3 Benedicto Lasque sa pakighinabi niini sa Banat News kagahapon mibutyag nga sa wala pa mahitabo ang insidente ang suspetsado ug ang biktima nagkalalis.

Mipauli sa ilang balay si Dambo ug mibalik nga nagdala na og pusil ug dayon gidul-itan niini sa pagpusil ang walang bahin sa lawas dapit ubos sa ilok ang biktima.

Matud ni Lasque nga ang suspetsado misulti kini paghuman og pusil nga “sorry To!, nakabawos na jud ko nimo” ug dihang natumba na ang biktima sa yuta giusban niya kini og pusil sa likod sa ulo niini ug mibuhi na usab og mga pulong nga nagkanayon “kung manulis gani ka bay ayaw ko og unaya!”

Sa laing bahin, naangol si Tata Barangan Alyas “Rene Chan” 32, kanhi residente sa sitio Litmon, barangay Poblacion human nga ang iya untang pusilon nga si Renante Mabini alyas “Pasyo”, 36, taga barangay Lagtang, Talisay nakigpinusilay usab niya.

Ang maong insidente nahitabo diha sa sitio Miramar mga ala 1:25 sa hapon kagahapon.

Si Barangan adunay kasong murder tungod sa giingong kalambigitan niini sa pagpatay ug paglubong kang Teresita De Guzman diha sa likod sa balay niini niadtong Marso, 2009 ug direct assault tungod sa iyang pagpusil sa mga polis nga misikop unta kaniya kaniadto.

Si Barangan nakaangkon og samad pinusilan sa walang paa nga milahos sa tuong paa diin miungot sa sulod ug natapsingan sa ulo ang gidala ngadto sa Talisay City District Hospital sa Talisay Reaction Emergency Action Team (TREAT) apan tungod sa kahimtang niini gibalhin ngadto sa Vicente Sotto Memorial Medical Center.

Samtang si Mabini kinsa giingong duna say samad pinusilan daling miikyas ug gipangita sa mga polis hangtud sa oras sa pagsuwat niining balita.

Ang igsuon ni Barangan nga si Raymundo nga kapuyo ni De Guzman kaniadto kinsa usa sa suspetsado sa pagpatay sa maong OFW padayon pang gipangita sa mga polis.

Si Lasque midugang nga naglisod sila og kuha og mga impormasyon kabahin sa pinusilay nga nahitabo diha sa Miramar tungod kay ang mga tawo diha sa lugar mahadlok nga mosulti ngadto sa mga polis. (BANATNEWS)