CEBU, Philippines - Napalgang patay ang usa ka 36-anyos nga lalaki nga nabulit sa samad dinunggaban ang kalawasan ug dunay pinusilan nga nagbuy-od sa kasagbotan sa sitio Hilangga sa barangay Nalhug bukirang lugar sa lungsod sa Dalaguete niadtong Miyerkules sa alas-8 sa gabii.
Ang biktima giila sa kapulisan nga mao si Elidio Glariana Dicdican, nagpuyo sa maong lugar samtang nailhan hinuon ang gitumbok nga mipatay sa biktima nga si Rogelio Belandres, 25, kinsa gipangita sa kapulisan human miikyas sa ilang dapit.
Sigun sa imbestigasyon ni SPO1 Edwin Quilaton ug mga kaubanan sa Dalaguete Police Station ang biktima nabulit og samad dinunggaban ingon man pinusilan diha sa ulo nga maoy gituohang nakaingon sa iyang hinanali nga kamatayon.
Sa pakisusi sa kapulisan adunay karaang panagbangi ang duha sukad pa kaniadto.
Si PO3 Peter Isidro Jr., sa Dalaguete Police Station nga gikahinabi sa Banat News sa telepono miingon nga sigun sa nadawat nila nga impormasyon ang biktima kun mahubog magsige kini og panghagit sa ilang silingan ug mangita gyud og bikil.
Nagtuo ang kapulisan nga posibleng mao kini hinungdan nga gikabikil niini ang suspek.
Si Belandres gikuyogan ni Erwin Amandoron, 37, silingan ra sab nila niadtong Huwebes sa buntag paingon sa police station aron motahan sa iyang kaugalingon apan wala na ang armas ug kutsilyo nga gigamit sa krimen.
Kagahapon sa buntag si Belandres gidala sa kapulisan paingon dinhi sa dakbayan aron pormal nang pasakaan og kaso diha sa provincial prosecutors office. (BANATNEWS)