CEBU, Philippines - Gipasalig ni United States Ambassador to the Philippines Harry Thomas, Jr. ang padayong suporta sa kagamhanan sa Estados Unidos sa kampanya batok sa human trafficking sa Sugbo.
Namahayag niini si Thomas atol sa paglusad sa Movement of Anti-Trafficking Advocates (MATA) sa Cebu International Convention Center kagahapon diin kapin sa usa ka libo ka mga batan-on ang nanambong.
Gihagit usab ni Thomas ang kabatan-onan sa pagpatuman sa ilang gilagdaan nga kasabutan tumong sa pagsanta sa sindikato sa human trafficking sa Sugbo.
Ang kalihukan gipasiugdahan sa Panlalawigang Pederasyon ng mga Sangguniang Kabataan (PPSK) ug sa Visayan Forum Foundation, Inc. nga giabagan usab sa Unites States Agency for International Development (USAID).
Gihagit ni Thomas ang mga batan-on nga itaho dayun kung may mamatikdan nga dunay mga tawo nga buot mobiktima sa mga batan-on ilabi na sa kababayen-an.
Nahugyaw ang mga nanambong sa kalihukan sa dihang gilitok ni Thomas ang mga pulong, “Ako nalipay sa atong pagtinabangay sa pagsumpo aning problemaha. Daghang salamat sa inyong tanan.”
Si Thomas ug Gob. Gwendolyn Garcia ang nangulo sa pagpirma sa usa ka kasabutan kagahapon.
Nagpasalamat si Garcia nga gisanong ni Bokal Aladin Wilyamie Caminero, ang pangulo sa PPSK, ang iyang hagit nga mangulo sa kampanya sa kabatan-onan batok sa human trafficking.
Masaligon si Caminero nga ang kalihukan makadasig kini sa tanan nga magpakabana sa pagpanalipod sa kabatan-onan ug sa kababayen-an. (BANATNEWS)