Manag-inahan gireklamong illegal recruiters

CEBU, Philippines - Dili mominos 23 ka mga aplikante apil na ang asawa sa usa ka polis ang nabiktima sa ilegal recruiter nga inahan ug anak nga nagbase sa lungsod sa Carmen apan didto na madakpi sa kapulisan sa barangay Cogon sa lungsod sa Tuburan niadtong Huwebes sa alas 3:00 sa hapon. Ang inahan ug anak nga nagtingkagol na karun sa karsel mao sila si Emma Dagatan Conde Villamar, 59, ug anak niini nga si Eve Dagatan Conde Villamar, 36, pulos molupyo sa barangay Poblacion sa lungsod sa Carmen.

Giingong moabot og 23 ka mga aplikante ang nabiktima gikan sa Compostela, Carmen, Liloan, ug uban pang dapit apil na ang asawa sa usa ka polis sa lungsod sa Sogod.

Ang asawa sa polis ug taga lungsod sa Compostela nga mga biktima nga mihangyong dili magpahingalan mibutyag sa Banat News pinaagi sa telepono nga gipangayoan sila og tag P20 mil isip processing fee sa mga suspek.

Ang mga nadakpan gi-turnover ngadto sa lungsod sa Carmen kagahapon sa ala 1:00 sa kaadlawon nga gihatud nila ni P02 Alison Esmiro ug PO2 Pablo Arnoco sa Tuburan Polis nga gi-eskortan gyud sa mga biktima.

Matud ni SPO4 Edgar Dumangon sa Tuburan Police Station dihang nahinabi sa Banat News nga mga alas 3:00 sa hapon nagpanon ang mga biktima ug nagpakuyog ngadto sa barangay Cogon diin magpuyo ang mga suspek.

Ang usa sa mga biktima nga taga lungsod sa Compostela nga na-interbyu sa Banat News sa telepono mitug-an nga gi-recruit siya sa mga suspek sa milabay’ng semana ug gipasaligan nga makalarga sa United Kingdom (UK) sa pagka petsa 16 sa bulan sa Oktubre bugti sa paghatag og P120 mil.

Matud niya nanghuwam siya og kwarta aron makahatag sa gipangayo hinungdan nga nakauban siya sa paglarga paingon sa Manila niadtong petsa 12 ning bulana alang daw sa orientation seminar nga ipahigayun sa SM Mega Mall sa Manila ug migasto pa sila og P10 mil.

Apan pag-abot didto walay orientation seminar nga nahitabo hinungdan nga naminghoy silang 23 ka mga aplikante nga namauli sa pagka petsa 14 ug nidiretso sila sa kapulisan sa Carmen ug didto ilang nahibaw-an nga atua sa Tuburan ang mga suspek hinungdan nga ilaha kining giadto.

Ang asawa sa polis miingon nga P70 mil ang gipangayo niya ug P50 mil pa ang iyang nahatag nga down payment alang sa processing fee aron siya makatrabaho sa London ug may sweldong 400 dolyares matag semana nga ipaagi sa Mat Dowel Direct Employment nga agency.

Sumala pa sa ginang nga gawas kanila aduna pay laing batch sa mga nurses ug caregivers gipangayoan usab og tag P120 mil sa mga suspek nga mas daku og kantidad.

Ang mga biktima sa paghimo ning balita nag-asikaso sa buhatan sa kapulisan aron sa pagpasaka nila og pormal nga kaso batuk sa inahan ug anak nga illegal recruiter. (BANATNEWS)