CEBU, Philippines - Usa ka gituohang kawatan ang gipusil patay kagahapon sa kaadlawon diha sa sitio Mananga II, barangay Tabunok, dakbayan sa Talisay.
Ang biktima giila lang sa pangalan nga “Bukay” gibana-banang sobra 30-anyos, manglutoay og chicharon ug residente sa maong dapit apan lumad nga taga Negros Occidental.
Si Bukay nakaangkon og usa ka samad pinusilan sa walang bahin ibabaw sa iyang dughan ug gidala ngadto sa Talisay City District Hospital sa Talisay Rescue Emergency Action Team (TREAT) apan patay na kini nga nadangat sa maong tambalanan.
Ang kriminal usa ka wala mailhing lalaki kinsa daling miikyas human sa hitabo ug wala na maabti nila ni SPO1 Mikie Espina, PO2 Roy Sarsaba ug PO2 Stephen Sefuesca nga daling miresponde sa maong hitabo.
Si Espina nga nahinabi sa Banat News kagahapon mibutyag nga base sa ilang nahipos nga report si Bukay giingong may pagkakiriwan kini og kamot diha sa ilang lugar.
Apan nanarbaho kini diha usab sa sitio Mananga isip manglutoay og chicharon. Bisan sa kadugay na pagpuyo ni Bukay sa maong lugar walay nakaila sa tinuoray nga pangalan niini.
Gituohan nga si Bukay nangawat kini ug gigukod sa iyang nabiktima tungod kay dunay nakakita nga diha kini sa tabok sa sapa nga gigukod og usa ka wala mailhing lalaki ug dunay mga tawo usab nga mitabang og tudlo kung asa dapita midagan si Bukay.
Ang mga residente diha sa duol nakadungog og napulo ka mga buto sa armas. Hangtud sa oras sa pagsuwat niining balita wala pay mikuha sa patay’ng lawas ni Bukay diha sa morgue sa TCDH. (EIM) (BANATNEWS)