CEBU, Philippines - Usa sa mga kalihokan sa delegado sa 12th East Asia Inter Regional Tourism Forun (EATOF) nga gipahigayon dinhi sa Sugbo mao ang pagbisita sa Cebu Provincial Detention and Rehabilitation Center (CPDRC).
Kini aron pagtan-aw sa linawas nga pagsayaw sa mga dancing inmates sa CPDRC nga nabantog na kaayo sa tibuok kalibotan pinaagi sa internet tungod sa ilang nindot kaayong mga sayaw.
Nangulo sa pagpadala sa mga delegado sa EATOF mao si Gov. Gwen Garcia ug ubang mga opisyales sa lalawigan sa Sugbo.
Human makita ang sayaw sa mga piniriso sa CPDRC, gidayeg sa mga delegado ang mga piniriso kay mas nindot kaayo kining tan-awon itandi sa makita sa YouTube pinaagi sa internet.
Ang chairman sa Yogyukarta Tourism Authority sa nasud sa Indonesia nga si Tazbir niingon nga usa ka dakong prebilihiyo nga makita ang mga dancing inmates nga magsayaw ug iya kaayo kining gidayeg.
Si Tazbir miingon nga usa niya ka nindot nga kasinatian ang pagsaksi sa linawas nga pasundayag sa mga dancing inmates ug iya usab kining ipanabi ngadto sa iyang probinsiya ug sa nasud sa Indonesia aron sama kaniya masibot usab kini sa pag-anhi sa Sugbo aron mutan-aw sa sayaw sa mga dancing inmates.
Samtang si Assistant Minister on Tourism and Heritage sa Sarawak, Malaysia nga si Datuk HJ Talib Zulpilip miingon nga nakadayeg kaayo siya sa nakitang talento sa mga dancing inmates sa CPDRC ug nagpasalamat siya kang Governor Gwendolyn Garcia sa kahigayunan nga makakita sa sayaw sa CPDRC dancing inmates.
Human sa pagbisita sa CPDRC, giduaw usab sa mga delegado ang Museo Sugbo diin ilang nakita ang mga kabilin sa mga Sugbuanon sa karaang panahon.(WC) (BANATNEWS)