Pusher gipusil angol

CEBU, Philippines -  Kritikal ang kahimtang sa usa ka level-one drug pusher human kini gipusil sa duha ka lalaki nga nagsakay og motorsiklo didto sa Sitio Guiwanon barangay Poblacion, lungsod sa Dalaguete niadtong Huwebes sa alas 8:00 sa gabii.

Ang biktima mao si Edgardo Tan,36, ulitawo   nga taga barangay Mantalongon, usa sa mga anaa sa watchlist sa kapolisan, samtang usa sa duha ka tawong mipusil sa biktima nailhan lang sa ngalang Junjun nga taga Alcoy.

Si Insp. Dexter Basirgo sa Dalaguete Police dihang nahinabi sa Banat News nagkanayon nga   ang biktima mao pay pag-abot sa usa ka videokihan sa maong lugar ug naglingkod lingkod sa bangko.

Wala magdugay miabot usab ang usa ka motorsiklo nga gisakyan og duha ka tawo    ug ang angkas niini maoy nanaog ug maoy miluthang sa biktima.

Human masabak ang biktima misirit dayon pahilayo ang mga killer sakay sa ilang motor ug gibiyaan ang biktima nga nagbuy-od human maigo sa liog ug buko-buko ug dayon gihatud kini sa tambalanan sa dakbayan sa Sugbo.

Matud ni Insp. Basirgo   nga may kalambigitan sa gidiling drugas nga transaksiyon ang motibo sa krimen sanglit padayon nilang gipanid-an ang biktima isip number one sa ilang watchlist sa mga tigpayuhot og gidiling drugas sa lungsod.

Padayon pa ang imbistigasyon sa kapolisan paghipos sa kompletong ngalan sa suspek nga naila lang sa angga nga Junjun nga taga silingang lungsod sa Alcoy. (BANATNEWS)