Dumbol, 1 patay, 1 angol

CEBU, Philippines - Namatay ang usa ka babaye ug kritikal usab ang kahimtang sa kauban niini human dumbola ang    motorsiklo nga ilang gisakyan sa sakyanan nga gimaneho sa usa ka hubog nga drayber didto sa Marcelo Fernan Bridge sa barangay Pusok, dakbayan sa Lapulapu sa miaging gabii.

Ang namatay mao si Nova Wena Villardo, 30, minyo nga taga barangay Mactan sa maong  dakbayan, samtang ang   anaa sa talandugong kahimtang mao si Irene Zaragoza, 26 anyos, dalaga nga usa ka magtutudlo ug lumad nga taga barangay San Juan sa lungsod sa Palompon, Leyte.

Si SPO1 Dioscoro Arong sa traffic division sa Lapulapu City Police Office (LLCPO) miingon nga nagdagan paingon sa barangay Mactan ang motorsiklo nga gimaneho Zaragoza uban ni Villardo nga iyang angkas.

Dihang kalit lang silang gidumbol    kini sa usa ka van type nga sakyanan sa Hotel California sa barangay Basak nga gimaneho ni Ferry Dayon Goellegue, 29, minyo nga taga barangay Ibabao, Estancia, dakbayan sa Mandaue. 

Gumikan sa kakusog nga pagdumbol, nalagpot si Villardo ug mitugpa kini sa sementadong karsada nga nag-una ang ulo.

Gihatod dayon kini ngadto sa Vicente Sotto Memorial Medical Center diin didto siya ideklarar nga patay na.

Si Zaragoza nagpabilin karon nga anaa sa talandugong kahimtang samtang ang suspetsadong drayber namatud-ang lasbag sa ilimnong makahubog ug nagkagulkol na karon sa prisohan sa   dakbayan sa Lapu-lapu samtang gihikay na ang tukmang kaso batok niini. (BANATNEWS)