'Botcha' gi-monitor sa merkado

CEBU, Philippines - Gipahibalo sa presidente sa Central Visayas Pig Producers Cooperative (CVIPPCO) nga si Roland Tambago nga hingpit ang ilang gibuhat nga pag-monitor sa ilang mga sakop nga dili mopalusot og hot meat sa mga merkado dinhi sa Rehiyon-7.

Sumala pa ni Tambago nga mismo ang mga negosyante sa karne sa Central Visayas ang misaad nga dili sila magtinunto sa ilang negosyo aron magpabilin nga lig-on ang ilang negosyo.

Kini nunot sa mga nagsunod nga mga operasyon sa nagkadaiyang awtoridad sa Luzon ilabi na sa Metro Manila nga liboan ka kilong mga double dead meat kon ‘bocha’ nga karne ang nasakmit ning nakalabay’ng semana.

Ang maong mga karne giingong gikan sa namatay na nga mga baboy apan giihaw lang gihapon ug gisuwayan pagpalusot sa mga merkado publiko.

Ang mga tinugyanan sa panglawas nagkanayon nga peligro na sa panglawas sa mga tawo ang susamang mga karne tungod kay wala ma-eksamin ug posibleng nataptan na kini og kagaw ug ingon man sa kagaw nga maoy nakapatay sa maong mga hayop.

“Dili gyud ta kabuhat og bati sa atong pagpamaligya og karne, kay ang pagpamaligya og maayong kalidad nga karne maoy basehan sa pag-angkon og daghang kustomer. Kung dili ta magtinarong sa pagpamaligya, madaot ra pud ang imahe sa atong negosyo,” sumala pa ni Tambago.

Mitambag si Tambago sa kunsumidor nga kung mopalit og karne tan-awon gyud og maayo ang hitsura sa karne.

 “I-check gyud og maayo ang karne, kinahanglan nga dili lagom ug dili usab baho. Ayaw mo’g palit kanang giladlad lang sa kilid-kilid ,” sumala niini.

Sa iyang bahin, ang hepe sa Department of Veterinary Medicine and Fisheries (DVMF) nga si Alice Utlang mipasalig nga higpit ang monitoring nga ilang gihimo sa mga tindahan og karne dinhi sa dakbayan.

Sumala pang Utlang aron mas luwas, kinahanglang adto lang mamalit sa mga tindahan nga dunay certificate sa ilang buhatan aron segurado gyud nga maayo nga karne ang ilang gipalit. (BANATNEWS)