CEBU, Philippines - Nia sa Sugbo si US Ambassador Harry K. Thomas, Jr. aron pagtambong sa ilusad nga Movement of Anti-Human Trafficking Advocates (MATA).
Ang kalihukan pagahimuon karong hapon sa Cebu International Convention Center sa dakbayan sa Mandaue diin si Thomas mopabati sa iyang pakigpulong.
Ang kalihukan gipasiugdahan sa Visayan Forum ug sa pagpakigtambayayong sa kagamhanan sa lalawigan sa Sugbo pinaagi sa buhatan ni Bokal Aladin Wilyamie Caminero, ang pangulo sa Panlalawigang Pederasyon ng mga Sangguniang Kabataan (PPSK) sa Sugbo.
Si Gob. Gwendolyn Garcia mohatag usab sa iyang solidarity message atol sa kalihukan nga tambungan sa mga mayor, mga kapitan ug mga Sangguniang Kabataan chairmen sa tibuok lalawigan sa Sugbo.
“This is in solidarity with all the women and children in Cebu, who are victims of domestic servitude, human trafficking, and other forms of abuse and exploitation,” sumala pa ni Caminero.
Nasayran nga giduso sa International Justice Mission ngadto sa Kongreso sa Estados Unidos nga ang Sugbo ang himuong modelo sa pagpakigbatok sa pagtrapiko og kabataan ug kababayen-an.
Si IJM national director Andrey Sawchenko nagkanayon nga ang Sugbo maoy labing importante nilang kaabag sa kampanya gumikan usab sa mga gipatumang programa ubos sa pamunoan ni Garcia. Sunod-sunod ang gihimong operasyon sa mga awtoridad sa Sugbo batok sa human trafficking nga miresulta sa pagkasikop sa mga responsabli lakip na sa mga langyaw. (EIM) (BANATNEWS)