Biyahe ni Gwen sa Japan malampuson

CEBU, Philippines - Malampuson kaayo ang pagbisita ni Governor Gwendolyn Garcia ngadto sa nasud sa Japan niadtong adlaw’ng Sabado sa pagtambong sa Tsuneishi Miroku Festival 2011.

Kauban sa gobernador   sa maong biyahe   mao ang mga partner ug opisyales sa Tsuneishi Heavy Industries Inc. nga nagbase sa lungsod sa Balamban nga gipangulohan sa Presidente ug CEO sa Aboitiz and Company, Erramon Aboitiz ug ni Hitoshi Kono ang presidente sa Tsuneishi Heavy Industry Inc.

Gikan sa Hiroshima airport, si Gobernador Garcia ug mga kauban milahos   ngadto sa Bella Vista Hotel diin sila gisugat ug gihangop ni Pilipinong Embahador Manuel Lopez uban sa hamiling kapikas niini.

Atol sa dinner party nga gialagad sa kagamhanan sa Japan, gikahinabi sa gobernador ang mga Sugboanon nga nagtrabaho sa Tsuneishi sa Japan.

Si Gobernador Garcia mitambong usab sa tradisyonal nga Buddhist Worship uban nila ni Embahador Lopez.

 Nasud-ong usab sa gobernador ug mga kauban ang Japan Century Symphony music concert   nga usa sa mga pasundayag sa maong kalihokan sa nahisgutang festival.

Ang presidente sa Tsuneishi Heavy Equipment Inc.- Cebu nga si Hitoshi Kono mipasabot nga sulod na sa hataas nga panahon nga gisaulog ang Tsuneishi Miroku Festival ug mabulokon kaayo ang ilang kasaulogan karong tuiga.

Samtang si Ambassador Lopez mitug-an usab nga ang pagtambong sa gobernadora sa kasaulogan nagpakita sa maayong kooperasyon sa Tsuneishi ug sa probinsiya sa Sugbo ug gani usa kini sa makapadasig sa dagkong mga negosyante sa Japan   sa pagbubo og mga dagkong puhonan sa negosyo dinhi sa Sugbo.

Bisan ang mga Aboitiz nga   partner sa Tsuneishi dinhi sa Sugbo miisip nga dakong kalamboan sa patigayon dinhi sa lalawigan sa Sugbo ang pagduaw sa gobernador ngadto sa Japan.  - BANAT NEWS