Kolektor sa lending gitulisa'g P21 mil

CEBU, Philippines - Mokabat sa P21 mil ang nasakiyo sa nagbinugtong nga tulisan gikan sa usa ka lending collector nga iyang gitulis didto sa Lower Tawog sa barangay Valladolid siyudad sa Carcar sa miaging gabii.

Ang biktima mao si Monicel Gelon, 31, minyo, ug kolektor sa Taytay sa Kauswagan lending company, ug kasamtangang nagpuyo sa Sta. Catalina, Poblacion, Carcar.

Si PO2 Rosendo Benondo, sa Carcar City Police   mibutyag sa dihang nahinabi sa Banat News  nga samtang naglakaw sa dalan   ang biktima gikang    naningil sa mga utangan sa ilang kompaniya, dihang    gi-atangan siya sa nag-inusarang tulisan sa maong lugar.

Nakurat nalang ang biktima dihang gitiuan kini sa tulisan og arams de fuego uban sa pagdeklalar nga tulis

Tungod sa kahadok sa biktima nga patyon siya, gitugyan nalang niya ang iyang shoulder bag nga gisudlan sa kinolekta niyang P21 mil.Human madawat ang bag misirit dayon pahilayo ang tulisan samtang ang biktima walay laing nahimo gawas sa pagsumbong ngadto sa kapolisan sa nahitabo kaniya.

Sa pagkakaron padayong gipanid-an sa kapolisan kinsay mitulis sa biktima.  - BANAT NEWS