CEBU, Philippines - Namatay ang usa ka 28-anyos nga lalaki human kini pusila sa tulo ka wala hiilhing kriminal kinsa nagsakay og motorsiklo didto sa sitio Salvador, barangay Tanke, dakbayan sa Talisay sa miaging gabii.
Ang biktima giila sa mga polis nga si Jundee Bacayo, taga sitio Tunga sa nahisgutang barangay.
Si Bacayo nakaangkon og duha ka samad pinusilan sa iyang ulo, usa sa tuong bahin sa liog, tuong bahin sa dughan, tiyan ug tuong kamot nga maoy hinungdan sa iyang kamatayon.
Sila si SPO1 Mikie Espina, PO2 Roy Sarsaba ug PO2 Stephen Sefuesca kinsa maoy miresponde sa maong insidente mibutyag sa Banat News nga nakadawat sila og report nga ang biktima giingong badlungon kuno sa ilang lugar.
Sa wala pa siya pusila, si Bacayo giingong didto sa balay sa iyang iyaan sa sitio Salvador apan tungod kay may mitawag kaniya sa cell phone nagdali kini nga mipauli sa ilang balay.
Apan samtang naglakaw kini sa karsada, kalit lang gihunongan sa usa ka motorsiklo nga gisakyan sa tulo ka wala hiilhing mga tawo dayon mipauwan og mga bala ngadto sa biktima.
Human mahagba sa yuta ang biktima dali kaayong nakabiya ang mga kriminal sakay sa ilang motorsiklo.
Padayon pang gipangita sa kapolisan ang maong mga kriminal. - BANAT NEWS