Ambulant vendors way labot sa plano

CEBU, Philippines - Mga ambulant vendors dili unta anha ibutang sa terminal sa traysikol sa bag-ong merkado sa barangay Lagtang kung i-accommodate man gyud kini sa mayor matud ni Bise Mayor Alan Bucao sa dakbayan sa Talisay.

“In the first place, these ambulant vendors were not part of the original plan. And so if the mayor wants to give them space at the new market, it should be elsewhere and not in the terminal area,” ni Bucao pa.

Si Bucao kinsa maoy chairman sa City of Talisay Traffic Operation Development Authority (CT-TODA) nagkanayon nga sa ilang mga meeting usa sa nahisgutan ang kabahin sa ambulant vendors nga buot sa mayor nga adto ibutang sa terminal sa traysikol.

Si Bucao nagkanayon nga walay problema sa pag-accommodate sa mga ambulant vendors ngadto sa bag-ong merkado sa Lagtang kung lakip pa lang unta sila sa plano kaniadto.

Ang mga ambulant vendors walay mga permit ug kaniadto sa daang merkado sa Tabunok anha lang sila maninda sa daplin-daplin.

“Okay ra unta kung gi-consider na sa una pa, pero wa man. Kung hatagan sila og space, dili unta i-sacrifice ang mga tricycle,” dugang ni Bucao.

Mikabat ngadto sa P3.5 milyones ang nagasto sa dakbayan sa Talisay sa pagtukod sa terminal sa tricycle human ang mga vendor ug mga drayber mireklamo nga maapektohan ang ilang pagpanginabuhi kung dili butangan og terminal sa traysikol ang bag-ong merkado.

Si Bucao midugang nga   gitun-an pa ang hangyo sa mayor ug manghinaot siya nga ang mga opisyal sa siyudad mokonsiderar sa ubang mga alternatibo.  - BANAT NEWS