CEBU, Philippines - Duha ka drayber sa motorsiklo ang nangamatay ug talandugon ang kahimtang sa tulo ka mga pasahero dihang ang ilang mga motorsiklo nagsampok tunga-tunga sa national highway sa Hacienda Felomina sa barangay Binabag siyudad sa Bogo niadtong Domingo sa alas 11:10 sa gabii.
Ang mga drayber sa motorsiklo nga pulos nakabsan sa ilang kinabuhi mao ang nagmaneho sa Yamaha RS-100 nga walay plate number mao si Jeffrey Pelaez, 36, taga barangay Gairan siyudad sa Bogo samtang ang drayber sa laing motorsiklo nga Suzuki rider dunay plaka nga 6686-QR mao si Arsenio Jeres Romo Jr., 21, molopyo sa Anunang Sur, Bogo City .
Samtang ang tulo niya ka pasahero nga anaa usab sa kritikal nga kahimtang mao ang iyang duha ka ig-agaw nga si Rolando Dela Cruz Jeres,31, ug Roldan Dela Cruz Batiancela, 24, ug ang barkada nga si Ronnie Capada Ypil pulos nagpuyo sa maong lugar.
Matud ni PO3 George Ocena, traffic investigator sa Bogo City Police dihang nahinabi sa Banat News, si Pelaez gikan sa Anunang Sur paingon sa siyudad sa Bogo samtang sa sugat nga direksiyon nagagikan si Romo nga dunay tulo ka mga angkas gikan sa Bogo Proper paingon nang mopauli sa Anunang Sur.
Gikatahong pulos kusog ang pagpadagan sa duha ka motor ug walay gisul-ob nga helmets ang mga sakay ug pag-abot sa nahisgutang lugar susama sila og manok sa buwangan nga nagsampok.
Ang mga estambay sa lugar mao nay daling mitabang sa mga biktima nga tulo ka pasahero ug kang Pelaez ug midala kanila sa Verallo District Hospital sa maong siyudad apan namatay si Pelaez sulod sa pipila ka oras. - (BANAT NEWS)