Traysikol sa Talisay wa ma-regulate

CEBU, Philippines -  Ang konseho sa dakbayan sa Talisay mipahinumdum kang Mayor Socrates Fernandez kabahin sa duha ka mga napasar nga resolusyon sa Sangguniang Panglungsod ug sa City of Talisay Traffic Operation Development Authority (CT-TODA) Board.

Ang resolusyon numero 2011-145 sa SP ug resolusyon numero 007 s. 2011 mao ang pag-regulate sa pag-isyu og Motorized Tricycle Operator’s Permit (MTOP) sa siyudad.

Si Bise Mayor Alan Bucao kinsa maoy nangamahan sa resolusyon nga nagpahinumdum sa mayor nagkanayon nga niadtong panahon nga naaprobahan ang nahisgutang duha ka mga resolusyon duna lay 1,747 ka mga traysikol ang narehistro sa siyudad nga nagbiyahe diha sa nagkalain-laing rota sa Talisay.

Apan wala pay labot niini ang daghan pang mga ilegal nga traysikol o mga kolorum ug ang uban niini giingong nahatagan gihapon sa siyudad og mga MTOP bisan paman aduna nay resolution nga nag-regulate niini.

Ang konseho nagpahimangno sa mayor nga ang padayong pag-isyu og MTOP makapasamot sa problema sa kahuot sa trapiko diha sa kadalanan sa siyudad.

Kahinumduman nga kasagarang kolorum nga mga traysikol naggikan sa mga silingang dakbayan ug lungsod sa Talisay. (EIM)(BANAT NEWS)