CEBU, Philippines - Tulo ka mga lalaki kinsa giingong nasakpan sa akto nga nag-pot-session gisikop sa kapolisan didto sa sitio Rattan, barangay Tanke, dakbayan sa Talisay kagahapon sa buntag.
Ang mga nasikop mao sila si Limber Polo Iñigo, 49, taga sitio Kimba, barangay Cansojong, Niño Rey Ayo Castro, 19, residente sa sitio Laray, barangay San Roque, ug Andrew Yuson Dabatos, 27, taga Sariville, barangay Poblacion, pulos nagpuyo sa nahisgutang siyudad.
Sila si SPO4 Daniel Tarucan, PO3 Benedicto Lasque ug PO2 Roy Lofranco maoy misikop sa mga suspetsado human nila kini hiabti sa akto nga nagsuyop og shabu sa usa ka payag sa nahisgutang lugar.
Si Iñigo nga mikaratil og dagan wala gihapon makaikyas kay nadakin-as kini nalamba sa yuta busa nadakpan gyud sa kapolisan.
Nasakmit sa mga polis gikan sa mga suspetsado ang mga shabu paraphernalia.
Sa laing bahin, ang asawa ni Iñigo ug ang menor de edad nga anak niini kinsa miadto sa police station nakurat kay wala sila magdahom nga sa pangidaron sa suspetsado nag-apil-apil pa diay gihapon sa maong bisyo.
Ang ginikanan usab ni Castro nakugang usab tungod kay wala sila magdahom nga ang ilang anak nagbisyo na diay sa ginadiling drugas.
Matud sa amahan ni Castro nga ang iyang anak gipangita pa sa iyang inahan aron pakan-on apan mao nalay ilang nasayran nga nadakpan kini sa polis kay nagsuyop og shabu. Ang tulo gikatakdang pasakaan og kaso karong adlawa.
Samtang didto sa Argao nadakpan usab ang upat ka tawo kay nasakpan gihapong nagsuyop og shabu didto sa barangay Tulic sa maong lungsod kagahapon usab sa buntag.
Ang nagkagulkol na karon sa prisohan mao sila si Kenneth Oyangoren, 25, Jannel Nasataya, 26, Dickson Alburoto, 29 ug Livingstone Panebio, 35, pulos mga molupyo sa nahisgutang barangay.
Nasakmit nila ni PO2 Rodrigo Teo, PO2 Bobby Naces, PO1 Eugene Sarabello ug PO1 Gerald Toquero ang mga shabu paraphernalia nga gigamit sa mga suspetsado.
Si PO1 Renato Nacaytuna nga nahinabi sa Banat News mibutyag nga nasikop nila ang upat sila makadawat og tip gikan sa mga nakasaksi kalabot sa pagsinuyopay og shabu sa mga suspetsado.
Ang ubang tigpaniid nagkanayon nga pasuyopsuyop og shabu ang maong mga suspetsado, unya inig kalipong na mopatay ug moihaw na sa ilang mga ginikanan. (WC) (BANAT NEWS)