Kapitan sa fastcraft wa motawag sa PCG

CEBU, Philippines -  Gikatakdang mag-atubang og imbestigasyon ang kapitan sa Weesam Express 8 tungod sa kapakyas niini pagpahibalo dayon sa Philippine Coast Guard Station-Cebu ang nahitabo sa ilang fastcraft niadtong Sabado sa hapon diha sa kadagatan sa barangay Lawis sa dakbayan sa Talisay.

Si Rolando Punzalan, station commander of the Philippine Coast Guard (CG)-Cebu Station nagkanayon nga mipagawas sila og maritime violation receipt batok sa kapitan nga si Kim Caroro.

Matud pa ni Punzalan nga ang Maritime Industry Authority-7 na maoy pormal unya nga mohimo og imbestigasyon batok ni Caroro.

Gipanalipdan ni Punzalan ang PCG sa mga report nga dugay silang makaresponde. Matud pa niya nga dili kasaypanan sa PCG nga malangay sa pagresponde kundili sa mismong mga sakyanan sa kadagatan nga di dayon magpahibalo sa ilang gidangatan.

Ang fastcraft sa Weesam nasangad diha sa Lawis, Talisay City pasado alas-6 na sa gabii.

“Unfair naman ‘yung sinabi nang iba, we tried to respond as much as we could pero kami pa rin ang masama,” matud pa ni Punzalan.

Sumala pa niya nga kung dili pa tungod sa mga pasahero nga maoy nanawag pagpangayo og tabang sa mga kabanay, sa PCG ug sa media dili nila mahibaw-an ang nahitabo sa maong fastcraft.

“After we received a call from a passenger of Weesam Express 8 asking for assistance, we immediately verified the report and called the captain of the fastcraft, kami na ‘yung tumawag sa kanila to verify the report,” pasabot pa ni Punzalan.

Miabot pa og 30 ngadto sa 35 minutos dihang ilang nakit-an ang maong fastcraft nga nasangad.

“What’s important is that we are able to rescue 208 passengers and 13 crew members on board on the stranded fast craft and they were safe now,” dugang pa sa opisyal.

Ang Weesam Express 8 mibiya sa Tagbilaran City alas 4:20 p.m. ug gikatakdang modunggo sa dakbayan sa Sugbu 6:20 p.m. sa Pier 4.

Samtang gisusi na usab sa PCG ang report nga dunay nakit-ang oil spill sa may Muelle Osmeña Pier.

“We are still gathering information and as of the threat of the oil spill it’s already recovered,” matud pa niini apan midugang nga aron makasiguro di una mokaon ang mga tawo sa isdang makuha sa maong dapit. (BANAT NEWS)