3,000 punoang marijuana giibot

CEBU, Philippines - Mikabat sa 3,000 ka mga punoan sa marijuana ang nalarot sa kapolisan didto sa utlanan sa sitio Lugsangan, barangay Tabon, sa lungsod sa Dalaguete ug barangay Patong, lungsod sa Badian kagahapon sa buntag.

Ang maong ronda   sa   usa ka plantasyon sa   gidiling tanom gipangulohan ni Inspector Dexter Balansag Bairgo, hepe sa Dalaguete Police Station  uban nila ni SPO2 Clito Pia, SPO1 Jorge Yap, PO3 Nicomedes Aliñabon, PO3 Peter Isidro, PO2 Godofredo Glipa, PO2 Noeh Rosales, PO2 Alan Sanoy, PO2 Maximo Belceña, PO1 Christopher Romarate ug PO1 Arnel Calisang.

Nasakmit usab   sa mga otoridad ang mga pinaugang dahon sa marijuana sulod   sa usa ka payag nga gipanag-iya sa usa ka mag-uuma nga giila lang sa ngalang “Danny”.

Si PO2 Reynaldo Amarillento sa pakighinabi sa Banat News kagahapon nagkanayon nga   ang grupo nga mironda sa plantasyon walay naabtang tawo   didto sa maong dapit busa wala silay   napangutana bahin sa mag-uumang nananom sa maong mga tanom.

Si Amarillento mihulagway nga ang sitio Lugsongan adunay unom ka kilometro ang gilay-on gikan sa lungsod.

Matud usab niya nga base sa ilang nahipos nga report nga adunay mga negosyanteng mosaka ngadto sa bukid aron mangompra og marijuana.

Sumala sa kapolisan nga ang maong   mga tanom nga gamitonon sa mga drug addict adto ihandos sa isla sa Negros   ug sa dakbayan  sa Sugbo. Miingon ang kapolisan nga nahimo nang bahin sa panginabuhi sa mga mag-uuma sa kabukiran ang pagpananom og marijuana tungod kay may mga komprador man niini.

Ang mga kapolisan sa lungsod nakig-alayon usab sa mga opisyal  sa barangay   sa bukid   aron mabantayan ang mga plantasyon sa marijuana sa ilang lugar ug gipaningkamotan sa kapolisan nga silay unang maka-harvest niini sa dili pa komprahon sa mga negosyante nga suki sa mga mag-uuma og marijuana. - WC (FREEMAN)