Press Freedom suportado sa konseho

CEBU, Philippines - Ang konseho sa dakbayan sa Talisay mosuporta sa kasaulogan sa Press Freedom Week karong Septiyembre 18 hangtud 24, 2011 ug sa Cebu Broadcasters Month niining buwan usab sa Septiyembre.

Usa ka resolusyon kalabot   sa maong suporta aprobado na sa konseho sa miagi nilang special session.

Gipangamahanan ni Konsehal Danny Caballero, ang tuno sa maong resolusyon naghisgot kalabot sa kamahinungdanon sa papel sa mga tigbalita.

Gani gibatbat sa maong resolusyon, nga   ang Pilipinas usa sa labing peligro nga nasud sa kalibotan nga  daghan na kaayo og mga tigbalita nga natipi gumikan sa ilang trabaho sa pagsabwag og mga kasayoran ngadto sa katawhan.

Apan bisan pa niini, wala kini igsapayan sa mga   tigbalita nga luyo sa kapeligro sa ilang trabaho, nagpadayon silang walay kukahadlok tungod kay giisip nila ang kasagrado sa ilang kaakohan ngadto sa publiko.

Labaw sa tanan nasayud ang mga peryodista nga protektado sila sa batakang balaod   sa nasud.

“The celebration, the only one of it’s kind being celebrated in the country, takes greater importance and urgency, coming on heels of escalating violence against journalists that has earned for the Philippines the ignominious tag of being the second most dangerous place in the world for journalist after Iraq”, tipik sa resolusyon ni Caballero.

Sa resolusyon   ni Caballero   nahisgotan niini ang nahitabo sa pagdeklara sa Martial Law niadtong Septiyembre 21, 1972 diin ang mga sakop sa media gihikawan sa ilang kagawasan sa pagsabwag sa mga impormasyon ngadto sa publiko.

Si Caballero nagkanayon nga sa unang pagpahigayon sa Cebu Press Freedom niadtong tuig 1994 way laing tumong   gawas sa   pagpahinumdom sa publiko ug sa mga sakop sa media nga angayang ampingan ang kagawasan nga gitugot sa balaod sa nasud ug sa tibuok kalibotan alang sa mga peryodista sa pagsabwag sa mga kasayorang gikinahanglan sa publiko adlaw nga tanan. - WC (FREEMAN)