CEBU, Philippines - Giunay pagpusil patay sa usa ka hubog nga lalaki ang iyang ig-agaw nga nagsige og badlong sa iyang pagpanghagis tungod sa pagkamaoy kun mahubog diha sa usa ka diskohan sa barangay Sohoton sa lungsod sa Badian niadtong Biyernes sa alas 5:00 sa buntag.
Ang biktima nga patay diha-diha ug wala na madala pa sa tambalanan mao si Gilbert Dela Torre, 35, samtang ang suspek mao ang iyang ig-agaw nga si Roel Dela Torre Pagao, 31, pulos mga molupyo sa nahisgutang lugar.
Matud ni SPO1 Geremias Elardo sa Badian Police Station dihang nahinabi sa Banat News ang biktima ug ang suspek kauban sa ilang mga barkada ang nagdisko sa wala pa ang hitabo. Samtang nagsayaw nagpunay sad sila og inom hangtud nga nangahubog ug nianang pagkakaadlawon misuol ang pagkamaoy sa suspek ug nanghagis ug nangita og away.
Ang biktima maoy nagsige og alam-alam sa suspek apan giingong nasuko kini ug gitukmod ang biktima hinungdan nga mipunit og basiyo sa botelya sa beer ang biktima ug gihapak kini ngadto sa suspek.
Tungod niini misamot og gara ang suspek dayon mibunot sa giluklok nga kalibre .22 magnum ug gipusil makaduha ka higayon ang biktima sa dughan.
Dihang mitalikod kini aron unta modagan gi-usban kini pagpusil sa suspek ug naigo na usab sa bukobuko kinsa mibarag ug nakabsan sa kinabuhi ug wala na madala pa sa tambalanan.
Ang suspek anha pa nahuwasan sa iyang gibuhat ug mikaratel og ikyas apan nadakpan ra gihapon kini sa hot pursuit operation sa kapulisan pagka alas 7:30 sa buntag diha sa ilang balay apan nagmagahi pagtahan sa armas. - Darrel A. Carumba/EIM (FREEMAN)