Rob-leader nangabang og pumpboat

CEBU, Philippines - Gitumbok nga lider sa napakyas nga pagsuway og tulis sa teller sa bangko diha sa Robinsons Department Store sa milabay adlaw’ng Lunes nga nakaiyas giingong miabang og pumpboat sa iyang pag-ikyas dinhi sa Sugbu.

Ang kapolisan padayon pang nangita sa tulisang si Dionisio “Junjun” Cabando kinsa giingong miabang og pumpboat diha sa Talisay niadtong Miyerkules sa iyang pag-ikyas.

Ang hepe sa Cebu City Police Office, Criminal Intelligence Branch nga si Chief Inspector Romeo Santander mibutyag nga si Cabando miabang og pumpboat diha sa barangay Tanke, dakbayan sa Talisay.

Kini duha ka adlaw human sa nahitabong tulis diha sa maong mall sa Fuente Osmeña nga miresulta sa kamatayon sa duha ka gwardiya ug sa tulo ka mga kaubanan ni Cabando nga nakigpinusilay sa kapolisan.

Matud ni Santander nga base sa ilang nadawat nga report nga si Cabando giingong luspad ug luya kaayo uban sa kapuyo niining si Merlyn Laguitao dihang misakay sa maong pumpboat niadtong Miyerkules nga ilang giabangan og P15,000.

Sa ulahing report, si Cabando giingong talandugon ang kahimtang tungod kay kini napusilan sa iyang sampot atol sa engkwentro sa mga sakop sa Mobile Patrol Group. Duha sa mga polis ang naangol sa maong insidente.

Human sa maong engkwentro giingong si Cabando ang mitago ngadto sa dakbayan sa Mandaue ug nangayo og panabang sa iyang kapuyo nga si Laguitao.

Si Laguitao ang giingong mihangyo sa iyang paryente nga si Anne Marie kinsa usa ka gradwado sa kursong nursing ug maoy mitabang paglimpyo ug paghatag og pasiunang tambal sa samad ni Cabando.

Human matabangi, si Cabando ug Laguitao nangikyas ug giingong nakit-an diha sa lugar sa amihanang bahin sa Sugbo.

Ang CCPO director nga si Melvin Ramon Buenafe ang nakig-alayon na sa kapolisan sa Ozamis City aron masikop si Cabando. - Brenda D. Batuto ug Ryan Christopher J. Sorote sa The Freeman/EIM (FREEMAN)