MCC giapelar ni Ouano sa PRC

CEBU, Philippines -  Giapelar ni Board Member Thadeo Ouano ngadto sa kadagkoan sa Commission on Higher Education (CHED) 7 nga hatagan og pagtugot ang 30 ka tinun-an sa Mandaue City College (MCC) Tipolo Campus nga makaapil sa eksamin sa Licensure Examination for Teachers (LET) nga gikatakda karong Septiyembre 25 niining tuiga.

Si Dr. Paulus Canete nga maoy nagdumala sa maong tulunghaan mibutyag sa Banat News  sa iyang kahinangop sa lakang nga gihimo ni Ouano. Sa resolusyon nga gipangamahanan ni Ouano, iyang gipasabot nga ang nahisgotang tulunghaan namugna sa lokal nga kagamhanan sa Mandaue pinaagi sa ordinansa numero 419   uban usab ang budget alang sa operasyon niini busa legal ang maong eskuylahan.

Dugang pa ni Ouano nga pinaagi sa pagdumala ni Dr. Paulus Cañete nakapakita kini og de kalidad nga produkto sa mga gradwado nga nahatagan og professional license sa Professional Regulatory Commission (PRC) 7.

Apan niadtong 2007 may gitukod ang kasamtangang administrasyon nga laing Mandaue City College nga maoy gihatagan og dakong pagtagad sa PRC ug hingpit   nang gisalikway niini ang MCC nga gidumala ni Cañete.

Gipaabot ni Ouano nga hatagan og pagtagad sa PRC ang iyang hangyo. (BANAT NEWS)