Nag-antog sa antugon gipusil patay

CEBU, Philippines -  Ang presidente sa kapunongan sa mga drayber sa habal-habal sa dakbayan sa Toledo gipatay sa duha ka wala ilhing kriminal samtang naghantak didto sa   parkingan sa barangay Bunga, dakbayan sa Toledo sa miaging Huwebes sa hapon.

Ang biktima mao si Clemente Echavez, 47, minyo, molupyo sa nahisgutang lugar ug presidente sa asosasyon sa mga habal-habal driver. Ang mga kriminal nagsakay og motorsiklo nga walay plate number ug walay nakaila kanila kay nagsul-ob kini og mga helmet nga sirado.

Si SPO4 Gil Lastimosa, desk officer sa Toledo City Police mibutyag sa Banat News nga samtang nagpaabot og pasahero nalingaw ang biktima sa pagpanghantak.

Sa dihang siya nay nagkupot sa antugon ug miantog, mao usay paghunong sa usa ka motorsiklo nga gisakyan sa duha ka wala hiilhing mga tawo.

Nanaog ang angkas niini ug gitayming nga pag-antog sa biktima sa antugon gitirohan ang tiyan niini   ug dihang nahagba sa yuta ang biktima misirit dayon pahilayo ang motorsiklo    nga gisakyan sa kriminal.

Ang biktima daling gihatod ngadto sa Carmen Copper Hospital sa barangay DAS sa maong dakbayan diin didto ideklarar nga patay na kini sa paghiabot.

Ang mi-responding kapolisan sa Presinto-1 sa Das   nga gipangulohan ni PO3 Edmund Liston ug mga kaubanan nakapunit og duha ka kabhang sa kalibre .45 nga gituohang gikan sa armas nga gigamit sa killer. Padayon pang gipangita sa kapolisan ang kriminal. (WC) (BANAT NEWS)