Kabanay sa napatay'ng 3 tulisan naproblema pagdala sa lawas

CEBU, Philippines -  Nangabot kagahapon sa buntag dinhi sa Sugbo gikan sa Ozamis City ang mga kabanay sa   tulong gipasanginlang tulisan nga napatay sa kapolisan atol sa napakyas nga pagpanulis sa teller sa bangko diha sa Robinsons Department Store sa nakalabay’ng Lunes.

Ang mga kabanay sa mga suspek nga sila si Antonio Adelan, Mario Dapitan ug Nelson Magsalay nangabot aron kuhaon ang ilang mga patay’ng lawas aron madala og balik sa ilang probinsya.

Ang asawa ni Adelan nga si Gina, 38, taga barangay Cogon, siyudad sa Ozamis miingon sa mga tigbalita nga iyang bana nananghid niadtong Sabado nga moadto sa barangay Clarin, Ozamis City aron maghatud og kahoy.

Nangayo pa kini og P500 nga panggasolina ug pangkaon apan nahibaw-an nalang nila nga napatay kini dinhi sa Cebu ug may kalambigitan sa tulis ang sirkumstansya sa kamatayon niini.

Samtang ang inahan ni Dapitan nga si Concordia, 59, taga barangay Bongbong siyudad sa Ozamis dili makatuong nalambigit sa kriminalidad ang iyang anak tungod sa kabuotan niini.

Matud pa niya tulo na ka tuig dinhi sa Sugbo si Dapitan ug nag-drive kini og pasaheroan nga biyaheng Mandaue-Lapu-Lapu ug magpadalahan kini kanila og kwarta.

Ang inahan usab ni Magsalay nga si Erlinda, 60, nga silingan ra sa pamilya ni Adelan mibutyag nga kaniadto pa bisan asa nalang moabot ang iyang anak.

Ang mga pamilya sa mga napatay nga tulisan pulos panguma ang panginabuhian ug gitabangan ra sa ilang higala nga makaanhi apan giproblemahan nila karon ang gastos sa pagdala sa ilang mga lawas balik sa Ozamis.

Ang hepe sa Cebu City Police Office (CCPO) nga si Sr.Supt. Melvin Ramon Buenafe miingon nga magtampo-tampo aron matabangan nga madali og dala ang mga patay’ng lawas. (BANAT NEWS)