Taoran sa CCTV camera gitun-an pa

CEBU, Philippines -  Nagpadayon karon ang siyudad sa pagtoon sa mga lugar nga posibleng taoran og closed-circuit television (CCTV) camera.

Sumala pa ni Engr. Eugenio Elizalde, presiding officer sa Police Coordinating and Advisory Council (PCAC) nga gawas sa pag-monitor sa krimen, magamit usab ang maong mga camera sa pag-monitor sa dagan sa trapiko, sunog ug uban pa nga kalamidad nga mahitabo ning dakbayan.

Sayo niini nakadawat og proposal ang siyudad gikan sa usa ka kompaniya nga namaligya og CCTV camera nga nagtanyag sa ilang produkto sa kagamhanan ning dakbayan .

Matag unit sa ilang camera nagkatindad og P350,000 ngadto sa P500,000 dala na ang pagpanaod nila niini sa mga lugar nga itudlo sa kagamhanan.

Ang tagdumala nga   si Engr. Francis Dy sa local distributor   nga GKB Security Corporation mipresentar sa iyang proposal ngadto kang City Administrator Jose Marie Poblete sa miaging adlaw human niya hisayri nga interesado si Mayor Michael Rama nga magbutang og mga CCTV camera sa kadalanan human sa sunod-sunod nga mga krimen nga nahitabo sa siyudad.

Ang maong mga camera mahimong maka-upload og video clip kutob sa ilang makuhang hulagway ngadto sa internet nga sayon kaayong makuha sa kapolisan, City Traffic Operations Management , fire department ug uban pang ahensya sa kagamhanan nga may labot sa pagbantay sa kalinaw ug kahusay ning dakbayan.

Ang maong matang sa camera migamit og 3G nga mo-transmit og signal   direkta gikan  sa ilang command center.

Tun-an pa sa siyudad ang maong proposal nga gituOhang makatampo   kaayo og dako sa pagbantay sa nagkadaiyang krimen nga mahitabo ning dakbayan. (BANAT NEWS)