Armas gipangita apan shabu nasakpan

CEBU, Philippines -  Moabot og 70 ka sachet sa gituohang shabu ug armas ingon man mga bala ang nasakmit sa pagpangronda sa kapulisan gikan sa pinuy-anan sa gituohang notadong tigpayuhot og ginadiling drugas sa barangay Canhabagat sa lungsod sa Medillen.

Ang nasikop sa hiniusang pagpangronda sa Police Regional Office (PRO-7) pinangulohan ni SPO2 Jesus Rojas ug kapulisan sa Medillen pinangulohan sa hepe nga si Insp. Manuel Suan Singson Sr. mao si William Cawaling Mercader, molupyo sa nahisgutang lugar.

Matud ni PO3 Paquito Suan dihang nahinabi sa Banat News nga ang pagkasikop sa suspek pinasikad sa search warrant nga giluwatan ni Regional Trial Court Judge Branch 57 Enriquita Belarmino sa alas 6:00 sa hapon niadtong Sabado tungod sa paghupot og armas.

Apan dihang gisiksik sa kapulisan ang pinuy-anan ni Mercader nakuha gikan sa sulod sa pinuy-anan niini ang 70 ka paketeng may sulod nga gidudahang shabu, ingon man .357 nga armas nga dunay unom ka buhing bala ug laing unom ka buhing bala sa kalibre .45. Matud ni Suan laing upat ka tag P50 nga kwarta nga gituohang halin ug 15 ka buok tag P20 ang nasakmit usab gikan sa posesyon sa suspek.

Matud ni Suan taud-taod na silang nakadawat og report may labot sa gikatahong pagpayuhot og ginadiling drugas sa suspek sa maong lugar hinungdan nga gi-aplayan kini og search warrant.

Ang nadakpan nga suspek kasamtangan karung gikustodiya sa rehiyonal nga buhatan sa Police Regional Office (PRO-7) alang sa pormal nga pagpasaka og kaso. (BANAT NEWS)