Paghimo og mga subdivisions sa bukid i-regulate

CEBU, Philippines -  Gipadayag ni Bise Mayor Joy Augustus Young nga angayan na gyud ang hingpit nga pag-regulate sa tukurong mga subdivision sa mga kabungtoran aron ma-monitor pag-ayo ilabi na sa ilaha palang pagsugod og develop sa lugar.

Nabantayan ni Young nga bisan asa na lang agi mosubay ang mga tubig gikan sa bukid sanglit sementado na kasagaran ang mga bukid nga nagpasabot nga hinay na ang pagtuhop sa tubig paingon sa yuta ilabi na panahon sa uwan.

Sumala pa ni Young nga usa kini sa mga hinungdan sa grabeng mga pagbaha sa siyudad.

Matud pa ni Rama nga nagkadaghan na ang namuyo sa siyudad busa nabahaan tungod sa mga development nga gihimo sa kabukiran partikular na sa mga kompanya nga nagdumala og mga subdivision.

Si Konsehal Noel Wenceslao maoy gitahasan ni Young nga moumol og ordinansa nga makahatag og kasulbaran sa maong problema ug usa na niini ang pagsusi sa daan nga balaod kalabot sa zoning ug ang ubang unod niini nga angayan usbon aron makaumol og bag-ong guidelines.

Matud pa niya nga sunod-sunod na ang uwan karong panahona busa angayan ang hingpit nga pagtuon sa mga aplikanteng kompanya nga mohimo og development sa kabukiran. (EIM)(BANAT NEWS)