P.Noy gi-gwapahan sa mayor sa Bais

Bais City, Philippines  — Gihangop sa taga dakbayan sa Bais City sa Negros Oriental   ang pagduaw ni Presidente Benigno Aquino III ug misubo kagahapon sa ilang Mercado de Bais nga gigastohan og P265 milyones.

Gidayeg ni Aquino ang kagamhanan sa maong dakbayan nga luyo sa ka-ordinaryo sa maong lugar apan nakapatukod kini og usa ka moderno nga merkado publiko nga may elevator. Ang merkado may duha ka andana nga nagbuntaog sa kinapusorang bahin sa maong dakbayan.

Ang flooring sa maong merkado may gilapdong 11,000 metro kuwadrado, may storage facility, may ice maker ug underground sewerage treatment plant sa silong nga bahin niini.

Sa iyang pagpamulong nga adunay parteng binisaya gipalanog ni Aquino ang iyang pagdayeg sa katahom sa 30-anyos nga dalagang mayor sa maong siyudad nga si Mayor Karen Villanueva nga matud pa niya maoy hinungdan nga naglisod siya og balibad kun aduna kini ihangyo kaniya.

Human sa dakbayan sa Bais miadto usab ang Pamuno nasud sa dakbayan sa Dumaguete alang sa pagsubo sa mga mahinungdanon usab nga proyekto sa maong dakbayan. (BANAT NEWS)