Langyaw wa mobayad sa pagkaon gipriso

CEBU, Philippines - Nagtingkagol sa karsel ang usa ka Australian national human kini dakpa sa kapolisan kay wala mobayad sa iyang gikaong paniudto sulod sa usa ka beach resort and restaurant didto sa Sitio Looc, barangay Poblacion sa lungsod sa Argao sa miaging hapon.

Ang gipriso mao si Gary Broush, 68, Australian national   nga nagpuyo sa barangay Langtad, Argao kansang asawa usa ka Argaoanon.

Ang mipadakop sa maong langyaw mao si Lodevina Rodriguez Monte, hingkod, nga taga Sitio Baha- baha, Poblacion sa maong lungsod kinsa maoy tag-iya sa kan-anan nga gikan-an sa suspetsado.

Si PO1 Bobby Naces sa Argao Police station mibutyag sa Banat News nga ang suspetsado mi-order og pagkaon nga bali og P336.00, apan pagkahuman niini og kaon milakaw kini og diretso nga wala mobayad sa iyang gikaong paniudto.

Busa gisikop sa kapolisan ang langyaw ug gibalhug sa karsel ug mibahad ang biktima nga pasakaan gyud niya og kaso ang suspetsado.  - BANAT NEWS