Pasahero gitulis sa driver

CEBU, Philippines - Usa ka dalaga nga pasahero sa taxi kinsa nakatulog samtang nagdagan ang taxi napugwat nalang dihang gipukaw kini sa sumbohan sa armas de fuego   sa wala hiilhing drayber sa taxi nga iyang gisakyan didto sa Gansaga bridge sa barangay Tayud , lungsod sa Consolacion sa miaging gabii.

Si PO3 Efren Fuentes sa kapolisan sa maong lungsod miila sa biktima nga mao si Estephane Riveral Ganancian, 21, nga taga barangay Dumlog sa dakbayan sa Talisay.

Matud pa ni PO3 Fuentes nga sumala sa giasoy sa biktima   nga gikan siya sa Chong Hua Hospital sa dakbayan sa Sugbo kay nagpa-check up sa iyang gipamati sa lawas ug misakay siya og Brint Taxi kay nagpahatod siya pauli ngadto sa ilang balay sa Dumlog.

Gumikan sa kaluya sa iyang lawas, nakatulog siya sa gisakyan niyang taxi ug wala na masayud sa gipadulngan niini.

Matud pa sa biktima nga mao nalay namat-an niya ang bugnaw kaayong sumbohan sa armas de fuego nga gidul-it sa iyang liog sa drayber kinsa mideklarar nga tulis.

Sa iyang kahadlok wala na siya moreklamo dihang gikuha ang iyang ariyos nga bulawan, singsing nga bulawan, silver nga kuwentas ug lakip na sa iyang salapi nga P300.

Human makuha ang maong mga butang   gipakanaog siya sa drayber   sa usa ka lugar nga dili niya sinati , samtang ang tulisan mipabulhot sa iyang sakyanan.

Ang mga drayber na sa habal-habal sa Gansaga, Consolacion mao nay mipahibawo kaniya sa dapit nga iyang nahimutangan ug giubanan siya ngadto sa buhatan sa kapolisan aron isumbong ang nahitabo kaniya.

Si PO3 Fuentes miingon nga wala makuha sa biktima ang plate number ug body number sa taxi nga iyang giluwanan gawas sa ngalan nga Brint Taxi.

Mao kini gisusi karon sa kapolisan sa Consolacion.  - BANAT NEWS