CEBU, Philippines - Usa ka drug pusher kinsa giingong nanambling o wala mobayad sa iyang kinomprang shabu gipusil patay samtang nanghinguto sa iyang anak sa wala hiilhing kriminal didto sa sudlonong bahin sa F. Ralota St., barangay Poblacion, dakbayan sa Danao kagahapon sa buntag.
Ang biktima mao si Rey Perez Bacamante, 38, residente sa maong dapit
Si SPO4 Edgar Gomez, duty desk officer sa Danao Police Station sa pakighinabi niini sa Banat News kagahapon nagkanayon nga base sa pasiunang imbestigasyon ni SPO1 Rodrigo Roble nga gituohang panimawos ang motibo sa maong hitabo tungod kay ang biktima ilado na kaayong pusher og shabu sa ilang lugar apan giingong wala mo-remit sa halin sa shabu nga iyang inangkat.
Nasayran usab gikan sa kapolisan nga ang balay sa biktima maoy gihimong suyopanan og shabu sa mga drug addict sa ilang lugar.
Sa wala pa siya patya may duha ka wala hiilhing lalaki nga misulod sa balay sa biktima ug samtang nanghinguto kini sa iyang anak gipusil nga walay daghang estorya.
Nabulit sa samad pinusilan ang kalawasan sa biktima nga maoy hinungdan sa hinanali niyang kamatayon.
Gipangita pa sa kapolisan ang mga kriminal kinsa miikyas dayon human sa hitabo. - BANAT NEWS