CEBU, Philippines - Gituohang wala mosaler ang giingong anting-anting nga gihabak sa hawak sa usa sa tulo ka tulisan nga napatay atol sa pinusilay tali sa kapolisan niadtong Lunes sa buntag sa pagtulis nila sa teller sa China Bank sulod sa Robinsons Department Store.
Si Antonio Adilan maoy nagsilbing drayber sa XRM nga maoy gate away vehicle kinsa nahagba sa kilid sa pader unahan og gamay sa inilang kan-anan sa may Ranudo St., human natusak-tusak sa bala sa M-4 ang kalawasan ug ulo niini atol sa ilang pakigpinusilay sa mga sakop sa Special Weapons and Tactics (Swat) team ug Mobile Patrol Group (MPG).
Apan ang mga sakop sa Scene of the Crime Operatives (SOCO) nga mihiling sa patay’ng lawas ni Adilan nakasuta nga duna kini gibakos sa hawak nga gituohang ‘anting-anting.’
Ang gibakos sa suspetsado diha sa iyang hawak may bala nga gipipi uban sa usa ka “libretto” nga iyang yamyamon aron dili siya hidutlan sa bala.
Matud sa kapolisan nga mao diay nga dugay kaayong nahagba si Adilan bisan pa kun naigo na kini sa mga bala tungod sa iyang habak nga anting-anting.
Apan si Supt. Arnel Banzon, hepe sa Swat team nga maoy nangulo sa pagresponde niadtong higayona nagkanayon nga kun tinuod man nga anting-antingan si Adilan dili kini magamit niya tungod kay ang maong buhat nga pagpanulis usa ka daotan.
Si Adilan kauban ni Mario Dapitan ug Melencio Quiapo apan siya ra maoy adunay daghang gihabak sa lawas.
Gani nasaksihan sa mga sakop sa media ug nakita ang gibakos ni Adilan sa iyang hawak sa dihang gihiling kini sa mga polis.
Ang tulo ka patay’ng lawas sa mga suspetsado nagkabuwag karon og punerarya dinhi sa dakbayan sa Sugbo, adunay anaa sa Saint Francis Funeral Homes sa dalan N. Bacalso Avenue samtang giingong aduna say anaa sa Saint Peter.
Sa gihimong pakisusi sa Banat News kagahapon sa buntag nasuta nga wala pay mga tawo nga miadto sa maong mga punerarya sa pagpaila nga sila mga kabanay nga mo-claim sa patay’ng lawas sa mga suspetsado. - BANAT NEWS