Amahan gipatay sa anak

CEBU, Philippines - Nakabsan sa kinabuhi ang usa ka amahan kinsa giunay pagpatay sa kaugalingon niyang anak nga nalisoan sa maayong pangisip didto sa ilang pinuy-anan sa barangay Matutinaw, lungsod sa Badian niadtong Lunes sa buntag.

Ang biktima mao si Alfredo Orbena, 63, nagpuyo sa maong lugar ug usa ka PUJ drayber, samtang ang suspek mao ra usab ang iyang kaugalingong anak nga si Fregion Orbena, 26, ulitawo kinsa nalisoan sa pangisip. Si PO1 Mauro Gramatica Jr., sa Badian Police Station mibutyag sa Banat News nga ang biktima naabtan sa kapolisan nga nagkadugo ang ulo ug nabulit sa samad   ang tibuok lawas samtang nalata ang ulo niini nga maoy nakaingon sa hinanali niining kamatayon.

Samtang ang suspek diha ra usab tupad sa patay na niyang amahan nga nagbuy-od sa sawog sa ilang balay.

Nasuta sa kapolisan nga gipusposan og kahoy sa suspek ang biktima ug dayon gilamba sa sawog sa ilang balay ang ulo niini hinungdan nga maayong pagkalata ang dapit sa iyang walang   tampihak

Walay nakapakgang sa hitabo tungod kay ang biktima lang ug ang suspek maoy nahabilin sa ilang balay niadtong tungora kay ang asawa sa biktima didto mohigda sa iyang agalon nga gitrabaho-an samtang ang ubang mga anak niini wala sa balay.

Matud pa sa mga otoridad nga gawas nga sila rang duha, malagmit dali kaayong gilupig ang biktima kay gawas nga edaran na, gamayon kini og lawas itandi sa suspek nga dako ug himsog kaayo og lawas.

Nadiskobrehan nalang nianang pagkabuntag nga patay na ang biktima.

Gihulagway sa mga kabanay nga ilang gi-atip ang suspek tungod kay kanunay kining masul-an og mag-wild.

Ang kapulisan nakapunit sa crime scene og lipak sa kawayan nga gituohang gilangkat sa suspek gikan sa ilang sawog nga may lansang pang nag-ungot ug nagkadugo nga posibling maoy gigamit niini sa pagpuspos sa ulo sa biktima.

Ang dapit sa alimpo sa biktima maoy nadugmok pag-ayo sumala sa kapolisan.

Anaa sa kustodiya sa kapolisan karon ang suspek ug gitakdang ipahiling kini sa doktor aron masuta ang utok niini.   - BANAT NEWS