CEBU, Philippines - Milupad na kagahapon paingon sa Xiamen,China si Mayor Michael Rama aron motambong sa usa ka International Trade Fair and Investment didto sa maong nasud.
Ang mayor gikatakdang mahibalik nganhi sa nasud karong sunod semana ug nanghinaot kini nga makakuha og dugang ideya sa maayong pagpadagan sa nagkadaiyang negosyo sa ubang nasud nga posibleng sagupon usab dinhi sa Sugbo aron makatampo sa pagpalambo sa ekonomiya ning dakbayan.
Nasayran nga pipila na ka higayong miduaw si Rama sa nagkalain-laing nasud ug kanunay nga gipaniguro niini nga sa iyang pagpauli nganhi sa Sugbo makabawon siya og maayong balita alang sa iyang mga konstituwente dinhi
Una na nga gipadayag sa mayor kaniadto nga dali ra maumol ang usa ka proyekto kung adunay pagtinabangay.
Kanunay nga gipatigbabaw sa mayor ang pakig-alayon sa nagkadaiyang nasud ug pipila sa naani niya nga hinabang gikan sa gawas mao ang medical mission sa taga gawas nga gipahigayon dinhi ug uban pa. (BANAT NEWS)