Rama ug Young managlahi og baruganan

CEBU, Philippines -  Managlahi na usab karon ang baruganan nila ni Mayor Michael Rama ug Bise Mayor Joy Agustus Young kalabot sa pag-convert sa Pasil Fish Market ngadto sa pagka-eskuylahan.

Si Young misaysay kagahapon nga hangyoon niya si Rama nga mas maayo nga tukoran na lang kini og school building aron kapahimuslan sa kaliboan ka mga estudyante.

Kaniadto daan nang gipadayag ni Rama nga himuong public plaza ang kasamtangang gitarokan sa    Pasil Fish Market sa higayon nga ibalhin na sa laing dapit ang maong merkado.

Ang maong public plaza butangan usab og playground sa mga bata kay buot ni Rama nga kahatagan og importansya nga matiman-an sa kabataan ang mga maayong proyekto sa gobiyerno alang kanila.

Gipadayag hinuon sa mayor nga aduna pa’y igong lugar nga katukoran og school building sa maong dapit.

Gisaysay sa mayor nga kaniadto nga usa sa makabintaha sa iyang giplano mao unya ang manimba sa San Nicolas de Tolentino Parish Church gumikan kay naglaraw siyang maablihan ang atubangang ganghaan sa maong simbahan.

Apan si Young nanghinaut nga mosugot si Rama sa iyang hangyo nga imbes plaza, school building na lang ang itukod sa maong dapit.

Nagkanayon si Young nga kasagaran karon sa mga kabataan sa Pasil tua magtungha sa   laing dapit busa angayan lang nga tagaan sila og pagtagad.

Sumala pa sa bise mayor nga nakahimo na siya og plano diin mokabat sa 38 ka mga lawak ang masulod   sa usa ka school building nga itarok sa maong lugar kun mosugot ang mayor.

Dugang pa niya nga angayang tagaan og pagtagad ang edukasyon ug ang paghatag   og maayong lawak sa kabataang magtungha maoy usa sa instrumento nga makatarong   sila sa pagtuon sa ilang leksyon sulod sa ilang klase. (WC) (BANAT NEWS)