Kaso batok polis gi-dismiss

CEBU, Philippines - Gi-dismiss ni Regional Trial Court (RTC) Judge Gilbert Moises sa Branch 18 ang kasong murder batok sa usa ka polis human bakwia sa duha ka mga saksi ang ilang testimonya.

Si Moises miabswelto kang PO1 Jose Dennis Malazarte sa kasong murder nga gipasaka batok kaniya.

Si Malazarte gipasanginlang mipusil patay ni Bienvenido Alfornon, hingkod ang panuigon, residente sa barangay Sambag I, dakbayan sa Sugbo sa miaging 2008.

Si Moises mihatag og direktiba sa Cebu City Jail Warden nga pabuhian dayon si Malazarte tungod kay mibakwi na sa ilang pamahayag ang mga saksi batok kang   Malazarte.

Si Anastacio Alfornon, 76-anyos, residente sa barangay Sambag I ug amahan sa biktima unang mi-testigos ug nagkanayon kini nga diha siya sa ilang balay dihang nakabati siya og buto sa armas ug   sa pagsusi niya niini, iyang   nakita ang iyang anak nga patay na.

Matud usab niya nga nakita niya ang akusado nga naglingkod ug nagkupot og pusil.

Si Rosario Quibodquibod, 43, witness sa prosekusyon nagkanayon nga niadtong Disyembre 6, 2008 mga alas 5:00 sa buntag naglingkod siya sa iyang karomata samtang nagluto og itlog ug iyang nakita ang akusado nga mipusil sa biktima.

Apan dihang ang duha ka witness sa prosekusyon gipresentar isip hostile witness alang sa depensa, si Anastacio mideklarar nga dili na siya interesado nga ipadayon ang kaso tungod sa tambag sa iyang mga apo.

Si Anastacio mibutyag nga gihatagan siya og kwarta ni Quibodquibod aron motestigo batok sa akusado.

Samtang si Quibodquibod nangangkon na kini nga wala siya makakita sa akto sa pagpatay sa biktima.

Matud niya nga nakadungog lang siya og buto sa pusil ug dihang misusi siya diha sa lugar nga nahitaboan nakita niya ang biktima nga wala nay kinabubi.

Si Quibodquibod nagkanayon usab kini nga gihangyo lang siya ni Anastacio nga motestigo ug si Anastacio maoy mogasto matag atubang niya ngadto sa korte.

Ang maong mga saksi nagkanayon nga wala sila panghulgaa sa akusado sa mao nilang pagbakwi.   - (BANAT NEWS)