CEBU, Philippines - Nabuslot ang buko-buko sa usa ka tawo nga gidunggab og pinute sa iyang silingan nga gilupig niya sa sinumbagay didto sa sitio Catarman II, sa barangay Catarman, lungsod sa Cordova sa miaging Domingo sa gabii.
Ang biktima mao si Reben Degamo, 31, ulitawo, nga taga Catarman ug ang suspetsado mao si Gerbi Pinote, hingkod, ang panuigon nga silingan sa biktima.
Si SPO1 Larry Wagwag sa kapolisan sa maong lungsod nga nahinabi sa Banat News miingon nga gikainom pa sa biktima ang suspetsado sa usa ka tindahan sa maong dapit sa wala pa ang hitabo.
Dugang pa niya nga dihang nahuman na ang ilang giinom nga ilimnon miawhag pa ang suspetsado sa biktima nga pun-an pa ang ilang giinom apan mibalibad ang biktima dayong tindog sa gilingkoran ug milakaw na pauli sa ilang balay.
Apan nasuko ang suspetsado ug nagbagolbol kining misunod sa biktima ug dihang naapsan kini nagkasinumbagay sila.
Nahunong ang sinumbagay sa duha dihang gibulag sila sa mga silingan nga maoy hinungdan sa pagpauli sa suspetsado sa ilang balay.
Apan pipila ka gutlo ang nakalabay mibalik kini sa maong dapit nga nagdala na og pinute ug diha-diha gidunggab ang bukobuko sa biktima.
Matud pa ni SPO1 Wagwag nga ang biktima dali nga gidala sa Lapulapu City Hospital sa dakbayan sa Lapulapu apan gibalhin kini sa Vicente Sotto Memorial Medical Center sa dakbayan sa Sugbo.
Ang suspetsado padayon pang gipangita sa kapolisan human kini makasibat - (BANAT NEWS)