Mag-uuma gipusil ug gitigbas patay

CEBU, Philippines - Patay diha-diha ang 35 anyos nga mag-uuma human tabangi og pusil ug tigbas   sa mga igsoon sa iyang gipatay, didto sa barangay Bayabas, sa siyudad sa Danao niadtong Domingo sa alas 11:00 sa buntag.

Ang biktima nga nabulit sa mga samad pinusilan ug tinigbasan mao si Roel Nunez Tanana,35 , minyo, usa ka mag-uuma nga molupyo sa nahisgutang lugar.

Samtang ang magsuong mipatay kaniya mao sila si Reneboy Hermoso, ug ang manghod niini nga si Segundino Hermoso, pulos hingkod, nga silingan ra sa biktima.

Si SPO2 Ildefonso Prosia sa Danao City Police Station mibutyag sa Banat News nga ang biktima nag-barug- barog atubangan sa usa ka tindahan sa maong  dapit, dihang kalit nga miabot ang mga suspek ug sa way daghang estorya gipusil dayon ni Reneboy makaduha ka higayon ug nasabak kini sa tuong abaga ug bukobuko, ug dihang nalukapa sa yuta ang biktima gitiwasan usab ni Segundino   pinaagi sa paggamit sa iyang sundang ug giligid kini og tigbas hinungdan nga samaron ang tibuok lawas niini gikan sa nawong hangtod sa buko-buko, kilid , tiyan ug uban pang bahin sa lawas nga maoy hinungbdan sa pagkabugto sa iyang kinabuhi.

Dihang natino na nila nga patay na ang biktima mibiya dayon ang duha sa nahitaboan   hinungdan nga wala kini hidakpi sa kapolisan.

Nasayran sa kapolisan nga usa ka panimawos ang gihimo sa mga suspetsado tungod kay ang biktima maoy mipusil patay sa ilang igsuon duha na ka tuig ang nakalabay.

Apan ang kaso batok sa biktima naareglo ra sa korte   nga maoy gituohang hinungdan nga nasuko ang mga suspek ug    nanimawos sa biktima.

Wa pa matino ang kalibre sa armas nga gigamit tungod kay walay na-recover nga bala ug kabhang sa bala didto sa crime scene.   - (BANAT NEWS)