Dugoong kagubot gipaabot sa Labogon

CEBU, Philippines - Gikabalak-ang mahitabo ang kagubot sa sitio Tuburan, sa barangay Labogon sa dakbayan sa Mandaue kun magpadayon sa pagpakoral ang pamilyang Cristobal Guido sa luna nga kasikbit sa gipuy-an sa 50 kapin ka pamilya kinsa mawad-an na og agianan ning tungora.

Kini ang gipadayag ni Kapitan Damaso Tumulak nga nahinabi sa Banat News kinsa nawad-an na og paglaum nga makab-ot ang malinawon nga sabot-sabot sa tag-iya sa luna nga nagpakoral ug mga molupyo nga apektado sa maong koral.

Matud pa ni Tumulak nga gihimo na niya ang tanang paagi nga masulbad nga malinawon   ang maong problema apan matud pa wala gayud niya mahilot dihang mibahad nga ang pamilyang Guido nga mangoral gyud sila bisan unsay mahitabo.

Nasayran nga walay laing bukas nga agianan ang 50 ka pamilya nga nagpuyo sa yuta nga kasikbit sa yuta sa mga Guido.

Busa karong koralon na ang maong yuta   tataw kaayo nga matanggong ang 50 ka pamilya ug maoy hinungdan nga hugtanon nilang gisupak ang lakang   sa mga Guido.

Sa sayo pa   ang apektadong mga pamilya   mihangyo nga kahatagan lang unta sila bisan gamay nga agianan, apan matud pa hugtanong mibalibad ang pamilyang Guido sa maong hangyo. Maoy hinungdan nga giduso   sa mga opisyal   sa barangay ang maong problema ngadto sa mayor sa dakbayan pinaagi sa ilang resolusyon   aron unta kahimoan kini og tukmang kasulbaran.

Apan matud pa ni Tumulak nga sa paglabay sa mga katuigan nahingangha na lamang sila kay gisugdan naman ang pagkoral sa maong luna pinaagi sa fencing permit nga giluwatan sa office of the building official sa dakbayan nga nagtugot sa pamilyang Guido sa pagkoral sa ilang luna.

Si Tumulak miingon nga higpit nga gibantayan sa kuwerpo sa kapolisan ang maong pagkoral   karon   aron kalikayan ang kasamok gumikan kay ang mga apektadong molupyo naglungot-lungot na sa kalagot.

Dugang nalantawang pagbanaw sa daghang dugo sa maong lugar mao ang kapungot sa mga tawo nga ang ilang mga balay lunopan na kay dili na makagawas ang tubig sa uwan gikan sa ilang lugar karong gikoralan na ni Guido ang iyang yuta. Si manlalaban Jovanni Tienero nga maoy city legal officer sa Mandaue dihang nahinabi sa mga tigbalita miingon nga gi-refer na sa iyang buhatan ang maong suliran ug ang iyang sugyot mao nga ang mga lumolupyo mangayo og road right of way gikan sa luna sa pamilyang Guido apan kinahanglan usab nga bayran sa hingtungdan ang tag-iya sa maong luna.  - BANAT NEWS