Container port tukoron sa Liloan

CEBU, Philippines - Bisitahan karong adlawa sa kadagkoan sa Japan International Cooperation Agency (JICA) ug Department of Transportation and Communications (DOTC) ang giplanong P20.4 bilyones nga bag-ong international container port sa mga lungsod sa Liloan ug Consolacion.

Ang JICA una na nga mihimo og pagtuon sa maong proyekto niadtong tuig 2000 apan giingong gitan-ugan lang kini sa Cebu Port Commission niadtong 2002.

Matud pa ni Cebu Port Authority General Manager Dennis Villamor nga niadtong miaging tuig lang sila nakahukom nga susihon pagbalik ang maong plano sanglit gikinahanglan na gyud nga adunay bag-ong pantalan sa mga dagkung barko ang Sugbo gumikan sa kahuot na sa kasamtangang Cebu International Port sa dakbayan sa Sugbo.

Gitun-an nga ang ubang lugar nga tukoran usab og pantalan mao ang isla sa Mactan, lungsod sa Minglanilla ug South Reclamation Project apan ang lugar sa Lilo-an ug Consolacion maoy napili sa JICA.

Matud pa ni Villamor nga modagan sa duha ka tuig ang pag-andam sa mga papeles sa dili pa sugdan ang pagtrabaho sa maong proyekto nga gibana-banang mahuman sulod sa tulo ngadto sa lima ka tuig.

Human makompleto ang pagtoon sa JICA, aprobahan pa kini sa Cebu Port Commission, ug iduso ngadto sa DOTC aron maandam ang papeles nga aprobahan sa National Economic Development Authority ug sa buhatan sa presidente sa nasud.  - BANAT NEWS