MCPO blangko pa sa ouano-ambush

CEBU, Philippines - Pabiling nag-atubang sa blangkong bungbong ang kapolisan sa dakbayan sa Mandaue kalabot sa pagbanhig patay sa negosyanteng miyembro sa dakong political clan sa dakbayan sa Mandaue.

Kini bisan paman sa gitanyag nga P1 milyong ganti sa pamilya sa biktimang si Antonio Ouano niadtong makahatag og impormasyon aron ilhon ang mamumuno.

Si Ouano gikatahong gibanhigan sa duha ka wala mailhing lalaking luwan og motorsiklo duol sa Cebu International Convention Center sa north reclamation area usa ka bulan na ang nakalabay.

Si Inspector Rex Lomente, hepe sa Investigation Detection and Management Bureau (IDMB) sa Mandaue City Police Office dihang nahinabi sa Banat News miingon bisan sa maong kantidad nagpabilin pa gihapon silang blangko.

Matud pa ni Lomente nga aduna silay nahipos nga mga pasiunang kasayuran gikan sa pipila ka mga tawo nga gipugngan lamang nila ang tinuod nga mga pangalan.

Gitataw ni Lomento nga ang maong mga kasayuran nga ilang nahipos dili pa gyud lig-on aron magtumbok og mga tawo nga responsable sa maong krimen.

Si Lomente miingon nga lakip sa ilang gipalawman sa pagtuon mao kadtong gibutyag kanila sa usa ka security guard nga miingon nga nakapaminaw kini sa panagkukabildo sa duha ka wala hiilhing lalaki nga naghisgot sa pagpamanhig sa negosyane. (EIM)   - (BANAT NEWS)