CEBU, Philippines - Himabaw nang tunga sa milyon ka pesos ang kantidad sa ulo ni Bella Ruby Santos karong migahin na ang Kapitolyo og P300 mil nga ganti sa makahatag og impormasyon sa kapolisan nga magganoy sa pagdakop sa suspetsadong midagit ug mipatay sa usa ka 6 anyos nga bata didto sa barangay Calajoan, lungsod sa Minglanilla sayo niining tuiga.
Ang maong kantidad gitanyag ni Governor Gwendolyn Garcia agi og pagpadasig sa publiko aron labing mokugi sa pagtabang sa mga otoridad aron madakpan si Santos.
Si Santos kinsa napalutsan na og warrant of arrest gi-wanted na karon sa kapolisan sa kasong pagdagit ug pagpatay kang Ella Joy Pique, ang 6 anyos nga batang babaye nga nagtungha sa Calajoan Elementary School sa lungsod sa Minglanilla.
Kaubang akusado ni Santos mao ang iyang uyab nga langyaw kinsa maoy giingong kakuyog niya sulod sa sakyanan dihang gidagit nila si Pique sa kahapunon niadtong Pebrero 8, 2011 sa paggawas sa bata sa ilang tulunghaan sa Calajoan.
Sayo niini ang kapolisan migahin og P50 mil gikan sa ilang kaugalingong bulsa aron iganti niadtong makatudlo sa nahimutangan karon ni Santos.
Karong P350 mil na ang katibuk-ang madawat sa informer, gituohan sa gobernador nga gaan na sa usa ka tawo ang pagtaho ngadto sa mga otoridad aron hidakpan si Santos.
May mga tabi-tabi sa publiko nga si Santos ania ra sa palibot apan ang iyang mga kabanay nagdumili lang sa pagkooperar sa kapolisan.
Ang anggulo nga nagpausab sa dagway si Santos pinaagi sa plastic surgery wala usab kaayo hatagi og gibug-aton sa kapolisan tungod kay kulang sila sa konkretong kasayoran bahin niining butanga.
Apan usa sa gibasehan sa publiko nga nia ra sa Sugbo ang gipangitang kriminal mao ang pagtanyag niini og hinabang ngadto sa mga biktima sa sunog sa barangay Carreta sa milabay’ng buwan.
Maoy hinungdan nga human magkatagbo sila si Gobernador Garcia ug si Sr. Supt. Patrocenio Comendador, ang hepe sa kapolisan sa lalawigan nakahukom dayon ang nahauna sa pagbundak og P300 mil aron dako-dako ang madawat sa informer. - (BANAT NEWS)