CEBU, Philippines - Usa ka pusher og shabu nga taga barangay Villagonzalo 2 dakbayan sa Sugbo nadakpan didto sa barangay Pacnaan, dakbayan sa Mandaue sa miaging gabii. Ang nadakpan mao si Harvey Ortega, 37, taga Villagonzalo 2, dakbayan sa Sugbo.
Si PO3 Retchie Ondo sa kapolisan sa Presinto 5 sa Mandaue City Police Office (MCPO) mibutyag sa Banat News nga dugay na nilang gipanid-an ang ilegal nga pamatigayon ni Ortega didto sa Zone Pechay sa barangay Pacnaan. Human nila masuta ang binuang nga negosyo ni Ortega nga nakapabuang usab sa taga Pacnaan, milusad dayon sila og buy bust operation uban sa usa ka police decoy.
Ang polis nga nagpakaaron ingnong buyer og shabu maoy nakigsabot kang Ortega nga mopalit og usa ka pakete nga shabu nga gibayran og P200 nga marked money.
Matud pa ni PO3 Ondo nga dihang gitunol ni Ortega ang shabu ug midawat sa bayad nga mao ang minarkahang kuwarta, gipugngan dayon sa police decoy ang kamot ni Ortega ug giposasan. Si Ortega nagkagulkol na karon sa detention cell sa Presinto 2 sa barangay Opao ug gitakdang pasakaan og kaso ugma. - (BANAT NEWS)