16 ka mag-uuma sa Aloguinsan nakapiyansa

CEBU, Philippines - Nakagawas na kagahapong adlawa ang 16 ka mga lalaking mag-uuma sa lungsod sa Aloguinsan nga gisikop sa kapolisan human giingong namato sa kapolisan atol sa pagpatuman sa kamandoan sa korte nga pakuralan ang yutang ilang gitikad nga giangkon sa pamilyang Gantuangco diha sa barangay Bonbon.

Si Atty. Ian Vincent Manticajon mibutyag sa Banat News nga kagahapon ra gyud nila napagawas ang nahibiling 16 ka mag-uuma tungod kay nalangan sila sa paghikay sa pipila ka mga dokumento nga angayang pirmahan.

Matud pa ni Manticajon nga ang release order nga gipirmahan ni RTC-Branch 29 Judge Ruben Altubar niadto pang Biyernes apan atrasawo sila sa oras hinungdan nga kagahapon pa nila natunol ngadto sa jail warden sa Cebu Provincial Detention and Rehabilitation Center (CPDRC) diin nabilanggo ang 16 ka mag-uuma.

Midugang si Manticajon nga ang 18 ka babayeng mag-uuma nga gipriso sa syudad sa Toledo gipagawas na usab niadtong Biyernes samtang ingon man ang tulo ka minor de edad.

Nagplano sila karun nga mosang-at og counter charges batok sa kapolisan ug kang Chief Supt. Ager Ontog Jr. tungod kay nagtuo silang aduna kini dakong kasayuran kalabot sa maong panghitabo.

Dugang pa niini nga ila usab nga ipaubos sa counseling ang mga mag-uuma human sila nakasinati og trauma tungod sa nahitabo kanila.    - (BANAT NEWS)