30 ka balay naugdaw

CEBU, Philippines - Gibana-banang 30 ka panimalay ang naugdaw sa nahitabong sunog kagahapon sa buntag pasado alas-10 sa sitio Kasagingan Banawa, barangay Guadalupe ning dakbayan.

Ang maong sunog giisa ngadto sa Task Force Alpha ug ang tanang fire trucks sa Sugbo ang miresponde.

Sa pakighinabi sa Banat News ni Cebu City Fire Marshall Aderson Comar mibutyag kini nga sulod sa 26 minutos nila nakontrolar ang maong sunog ug gibana-bana ang danyos nga mokabat ngadto sa 300 mil ka pesos

Matud pa ni Comar nga base sa ilang nakuha nga impormasyon nagsugod ang maong sunog sa panimalay sa usa ka Era Pantonial.

Sagad sa mga panimalay hinimo sa light materials samtang ang uban mixed-materials ug uban usab niini mga shanty houses lang nga ginama sa mga gitapak-tapak nga kahoy.

Butyag usab ni Comar nga usa ka Vincent Mañigo ang nakaangkon og 3rd degree burn ug gidala sa Cebu City Medical Center . Giingong mibalik kini og sulod sa ilang balay bisan nagdilaab na kini aron kuhaon ang ilang mga butang. Sama sa ubang mga nahitabong sunog sa dakbayan, si Comar mibutyag nga hagip-ot kaayo ang agianan ug sudlonon kini maong naglisod sila pagtaak sa sentro sa sunog. 

Ang mga fire trucks diha lang sa Banawa Elementary School nanukad ug gisumpay-sumpay ang mga fire hoses aron makaabot sa fire scene.

Gisusi pa sa mga arson investigators kung unsay hinungdan sa maong sunog.   (EIM)   - (BANAT NEWS)