CEBU, Philippines - Natumbok na sa kapolisan ang mastermind kon utok sa kamatayon ni anhing Assistant City prosecutor Patrick Osorio ug gisang-at na sa kapolisan ang kaso batok niini ngadto sa buhatan sa piskaliya kagahapon sa buntag.
Kini maoy gibutyag ni Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO) atol sa pakighinabi kaniya sa mga sakop sa media kagahapon.
Matud pa ni Santander nga tua na sa city prosecutors office ang maong kaso karon ug gitugyan nila sa Homicide Section ang pag-atiman niini.
Iyang giasoy nga ang mastermind kansang ngalan ilang gipugngan maoy gitumbok ni Lyndon Horandoy, ang barbero nga ilang nadakpan sa miaging gabii didto sa bukiran g barangay sa dakbayan sa Sugbo ug maoy miangkong trigger man sa pagpatay kang Osorio.
Midugang si Santander nga padayong mikooperar kanila si Horandoy ug iyang giklaro nga wala gyud nila dali-dalia ang maong kaso sanglit ila mang gisubay ang proseso aron dili sila mabulilyaso sa sunod nilang pagabuhaton.
Matud ni Santander nga lig-on nilang basehanan sa pagpasaka og kaso batok sa mastermind gumikan sa testimonya ni Horandoy kinsa miangkon gikontrata siya ni Allan Senogat nga siyay papusilon kang Osorio.
Hinuon si Senogat anaa na sa prisohan human kini hidakpi sa mga sakop sa CIDG 7 sa miaging tuig.
Matud pa ni Santander nga sa dihang nahiabot na sa ilang buhatan si Horandoy, ila kining gipasud-ong sa hulagway sa posibleng mastermind ug didto gitumbok niining positibo ang maong hulagway nga maoy utok sa pagpapatay kang assistant prosecutor.
“Ang amo lang gyud nga nahibaw-an nga motive. Worked related sa iyang pagka piskal,” pahayag pang Santander.
Wala na hinuon mohatag pa og dugang katin-awan si Santander bahin sa motibo nganong gipatay ang piskal sanglit iyang girespeto ang desisyon sa pamilya sa biktima. (BANATNEWS)