Lauron girilibohan na sa puwesto

CEBU, Philippines - Si Insp. Rolly Lauron, ang hepe sa kapolisan sa lungsod sa Dumanjug girilibohan na human siya suspendiha og usa ka buwan sa Campo Crame tungod sa kasong simple neglect of duty.

 Si Sr. Supt. Patrocinio Comendador, hepe sa kapolisan sa probinsya nagkanayon nga kasamtangan niyang gipuli ni Lauron ang deputy niini nga si SPO3 Felipe Vivar isip Officer in Charge (OIC).

Sumala pa ni Comendador nga iya dayong gipahibawo si Mayor Nelson Garcia kabahin sa suspension order ni Lauron ug iyang gitudlo nga OIC si Vivar.

Matud niya nga ang pagsuspenso kang Lauron mahinungdanon kaayo aron   nga dili kini makahasol sa imbestigasyon sa kaso nga iyang giatubang   gumikan sa pagpusil niya sa tawo nga nakasulod sa iyang opisina ug nang-hostage og laing bisitang babaye. Miingon si Comendador nga magpadayon gihapon ang ilang imbestigasyon kalabot sa maong hostage taking   bisan pa og   naluwas ang kinabuhi sa gi-hostage niadtong higayona.

Matud ni Comendador nga sa imbestigasyon anha mahibaw-an kun unsay nakita nila nga leksyon sa kapolisan niadtong hitaboa nga mismo diha sulod sa police station mahitabo.

Tungod niini si Comendador miluwat na og memorandum ngadto sa tanang hepe sa kapolisan sa probinsya nga nag-awhag kanila nga magmabinantayon   nga dili na masubli ang nahitabo sa Dumanjug.

Gani nagkanayon siya nga sa matag conference nga iyang himuon alang sa tanang hepe sa kapolisan sa probinsya iya kining iapil sa lecture unsaon ang pag-handle sa hostage taking sulod sa police station. (BANATNEWS)