Di na pasudlan ang Tabunok market
CEBU, Philippines - Ang kanhi merkado publiko sa Tabunok, dakbayan sa Talisay higpit na gyud nga dili pasudlan og mga tawo.
Si Superintendent Eddie Recamara, officer-in-charge sa Talisay City Police Station sa pakighinabi sa Banat News mibutyag nga niadtong Huwebes dunay giluwatan nga kamandoan si Mayor Socrates Fernandez nga higpit na gyung dili pasudlan ang daang merkado.
Hinuon gawas sa mga sakop sa taga City Hall , kadtong mga vendor nga duna pay kuhaon nga mga butang diha sa sulod tugotan nga makasulod aron pagkuha niini apan ubanan sila og blue guard sa ilang pagsulod.
Matud ni Recamara nga dunay mga blue guards ang idestino diha sa lugar nga magbantay sulod sa 24-oras matag adlaw diin ipaubos sa tulo ka shifting ang duty.
Gawas sa mga blue guards dunay mga polis nga idestinong mobantay diha sa entrada sa koral sa kanhi merkado ug dunay mga polis usab nga mag-roving sa palibot.
Kagahapon sa hapon gikatakda ang pinal nga clearing sa kanhi merkado diin duna pay pipila ka mga vendors ang mga naninda diha sa sulod bisan og gipabalhin na sila ngadto sa bag-ong merkado sa barangay Lagtang.
Si Recamara midugang nga posibleng mapasakaan na og kaso sa siyudad ang mga mosulod diha sa merkado nga walay pagtugot. (BANATNEWS)
- Latest
- Trending
