Osmeña gidayeg ni Rama apan...

CEBU, Philippines - Gidayeg ni Mayor Michael Rama ang planong pag-apod apod ni Kongresista Tomas Osmeña og mahalon nga gadget nga gitawag og ‘galaxy tablet’ ngadto sa tanang kapitan sa siyudad sa Sugbo.

Apan si Rama nanghinaut nga magamit unta ang maong tablet sa mga kapitan nga dunay koneksyon sa ilang mga trabaho.

“Okay raman na nga dunay ihatag sa mga kapitan, seguro kung duna siya’y sunod nga ihatag mas maayo nga mangutana una siya sa barangay kung unsa gyud ang nag-una nila nga panginahanglanon,” matud pa ni Rama.

Dugang pa niya nga dili siya mohatag og malisya sa gibuhat ni Osmeña ilabi na nga apilan sa paghatag niini ang north district nga dili man unta kini sakop sa hurisdiksyon sa kongresista.

Nasayran nga apil sa hatagan ni Osmeña og galaxy tablet ang mga kapitan nga dili niya kaalyado sa politika sama nila ni George Rama sa Basak-San Nicolas ug Jose Navarro sa Punta Princessa. Mipadayag hinuon si George Rama nga dawaton niya kini bisan pa man nga nagkabikil sila karon sa kongresista.

Ang galaxy tablet usa ka mahalon nga gadget nga mokantidad sa dili mominos og P20,000 nga susama og gamit sa usa ka laptop.

Si Kapitan Pancho Ramirez sa Sto. Niño misaysay nga gamit kaayo niya ang galaxy tablet ilabi na karon nga nagkataas karon ang demanda sa teknolohiya sa pag-save og mga files ug uban pa. (EIM)